“Skaut klubları Gəncə məktəblərində” layihəsi çərçivəsində 3 günlük yay düşərgəsi keçirilib.
Azərbaycan Respublikası Elm və Təhsil Nazirliyinin Təhsildə İnkişaf və İnnovasiyalar üzrə VIII qrant müsabiqəsinin qalibi olan “Skaut klubları Gəncə məktəblərində” layihəsi çərçivəsində təlimlər və ekskursiyalardan sonra 3 günlük yay düşərgəsi təşkil olunub.
Düşərgə Göygöl şəhəri, Köşkü kəndinin ərazisində baş tutub. Təbii və sakit mühitdə keçirilən bu düşərgə şagirdlərə həm əyləncəli, həm də öyrədici bir təcrübə yaşadıb.
07-09 iyun tarixlərində keçirilən düşərgə müddətində şagirdlər “dağda yürüş”, “haykinq”, komanda oyunları və digər praktiki fəaliyyətlərlə məşğul olub, müxtəlif bacarıqları formalaşdıran təlimlərə cəlb ediliblər. Bu proses onların fiziki hazırlığı ilə yanaşı, sosial bacarıqlarının, liderlik və əməkdaşlıq qabiliyyətlərinin inkişafına da böyük töhfə verib.
Qeyd edək ki, “Skaut klubları Gəncə məktəblərində” layihəsi Gəncə şəhər Ş.İ.Xətai adına 13 nömrəli tam orta məktəbin direktor müavini Rza Ələsgərov tərəfindən həyata keçirilir. Layihə çərçivəsində məktəbin seçilmiş 5–8-ci sinif şagirdləri ilə silsilə təlimlər, maarifləndirici ekskursiyalar və yay düşərgəsi təşkil olunub.
