Ötən il həyata keçirilmiş “Azərbaycanda gənclərlə işləyən Təlimçilər üçün Təlim (TRAYAZE)” təlim kursunun demokratik yanaşmalar əsasında gənclər işinin və Azərbaycanda qeyri-formal təhsilin gücləndirilməsi üçün Qiymətləndirmə və konsolidasiya seminarı Fransanın Strazburq şəhərindəki Avropa Gənclər Mərkəzində başlayıb. Noyabrın 28-dək davam edəcək tədbirdə iştirak edən təlimçilər arasında Azərbaycan Skautlar Assosiasiyasının Milli Baş Müvəkkili Ülvi Məmmədov da yer alır.
Azərbaycan Respublikasının Avropa Şurası yanında daimi nümayəndəsi Fəxrəddin İsmayılov, Azərbaycan Respublikasının gənclər və idman nazirinin müavini İndira Hacıyeva, Azərbaycan Gənclər Fondunun İcraçı direktor vəzifəsini müvəqqəti icra edən Qədir Xəlilov, Avropa Şurasının Gənclər Departamentinin Təhsil və təlim şöbəsinin müdiri Rui Qomeş təlim səfərinin açılış mərasimində iştirak etmiş, təlim kursunun əhəmiyyətini vurğulamış, iştirakçılara uğurlar arzulamışdır.
